Escucando estrelles

Anque equí los llumbreres que manden digan qu’esa crisis que nun nomen va durar hasta la primavera del añu que vien, munchos de los espertos dicen que pue duranos guapamente hasta’l 2009. Hasta’l Bancu Central Européu dixo que va acabar subiendo los tipos pa frenar la inflación. Y como los españolinos nun aforramos nada, les perres coles que nos empufábamos pa les hipoteques yeren euros foriatos: americanos, franceses y alemanes sobre too… y esos agora nun vienen, asina que toles entidaes tan intentando garrar perres a los sos clientes por si nos próximos meses namás tienen lo de casa (esa ye la esplicación de tolos cartelos que cuelguen nos escaparates) y vendiendo les sos participaciones industriales. Anque, la verdá, nun tienen porqué danos pena: mientres que’l P.I.B. español quedó nun 3,8 %, los beneficios de los bancos esti añu espoxigaron un 20 % hasta setiembre.

Y ante’l bastiazu que s’acolumbra, España ye’l país de tola eurozona (xunto con Irlanda) que más competitividá esterior perdió dende 1999, namás y na menos que 15 puntos enteros. ¿El motivu? L’aumentu de los nuestros precios (por dexar munches propines, seique) y la cotización del euru. España tien, agora mesmo, el segundu mayor déficit esterior de tol mundu (tres los USA), según datos del Bancu d’España hasta setiembre, el déficit anda rozando los 75.500 millones, o seya 9,8 % del valor del nuestru P.I.B., colo que vamos andar raspiando los 100.000 euros a final d’añu (esti datu vamos poder confirmalu nun par de meses).

La Comisión Nacional de la Enerxía diz que les tarifes eléctriques tienen que subir polo menos el 4,1 pa igualar l’IPC . Tamién nos contaron los del Gobiernu que diba ser malo que subieren los salarios l’IPC, porque de xuru que va baxar depués. Dicho un par de díes depués de saber que, d’un añu pa otru los directivos de les empreses del IBEX tuvieron una suba nel sueldu del 33 %) y que, según un estudiu de BBVA fechu públicu esta selmana, la construcción va echar a la cai pal añu que vien a 90.000 persones y a otres 160.000 pal 2009… meyor despedilos que subi-yos el sueldu.

Según un estudiu de Caja España, Asturies va acabar l’añu con ún de los espoxigues más baxos de toles rexones españoles, namás un 3,2 % (sólo ganamos a Baleares). Y ya ye la rexón española que más mocedá pierde, polo que la población nun para d'avieyar… Por ciertu ¿cómo se pue llamar a una lleenda urbana que demuestra ser verdá?

Per nun vos preocupéis, que los nuestros estrategues empresariales (esos que lleven coles uñes clavaes na poltrona venti años) quieren abrir mercaos en Sudáfrica y Angola: siempre habrá otru más probe pa poder aprovechase d’elli.

Felices fiestes.