Vamos sobraos
Asturies, mal que pese a dalgún, nun ye una islla. Ye un territoriu asentáu nun país mayor llamáu España, metíu a la so vez na UE. Por eso choquen dalgunes de les situaciones que se dan nesti requexu del mundu. Choca por exemplu qu’ayeri, pela mañana, el conseyeru d’economía nos diga que’l nuestru PIB va baxar hasta’l 2,5 % (un puntu menos que nel 2007), pero que vamos siguir ganando puestos de trabayu (433.000 persones anguaño) y competitividá, y qu'a la fin d’esti mandatu vamos algamar la renta per ciudadanu del restu de la UE. O seya, que tamos nuna posición inmeyorable pa esti “cambiu de ciclu” al que tan llamando a la desaceleración económico. Dizlo nuna de les rexones cola tasa de productividá y d’actividá más baxa de tol país, fixándolo too pal futuru na obra civil y nun supuestu avance del turismu. Nun ta de más saber que la selmana pasada un estudiu de la Fundación BBVA dixo qu’Asturies yera una de les rexones menos competitives d’España, y que, pa con too, empeoró nos últimos venti años. Cuando la economía global, nacional y rexonal tan frenando, tamién lo faen los ingresos fiscales n’Asturies. Dalgunos ya se tan asitiando como l’Ayuntamientu de Xixón que ya dixo que los impuestos van subir un 26 % nos próximos cuatro años (xuégovos lo que queráis a que los salarios nun suben tanto). Nel principáu fíenlo too na contención del gastu sanitariu, tema que día si y día tamién, nun para de salir na prensa, preparando’l tarrén pa lo que nos va venir. Too eso, ensin escaecer que somos parte del segundu país mundial con peor déficit esterior (diferencia ente importaciones y esportaciones, mas les rentes y tresferencies pa fuera) tres USA. Pasamos de los 100.000 millones d’euros, un nuevu record que nos asitia ya perriba del 10 % del PIB. Que traducío en cristiano ye: como país vivimos perriba de les nuestres posibilidaes, subiendo la deuda pa mantenenos. Y los que viven d’un sueldu ven como van perdiendo poder adquisitivu: la suba media nos salarios ye del 3,7 y la inflación ye del 4,2. Asina que vamos gastar menos, y más comercios que van chapar y echar a la xente al paro. Y, como esti ye un un mercáu global, pela tarde la FED anunciaba que baxaba’l preciu de les perres por tercera vez esti añu, hasta asitialu nel 2,25, pa intentar combatir la recesión, lo que de xuro nos va subir de rebote la gasolina. Y como'l Bancu Central Européu nun se baxa de la burra y los caltién nel 4 % pa evitar la inflación, vamos pasales putes. Salú, polo menos.
Esbilla
del.icio.us
Nací col don de la risa y cola intuición de que’l mundu taba llocu.
Y esi foi tol mio patrimoniu.
Bah, de fame nun vamos morrer... ;) En serio... siempre pensé que xestionar un país d'un millón d'habitantes podía facese colos güeyos zarraos. Pero, en cuenta de xestionar pal territorio se xestiona otra cosa. En términos económicos, Asturies nun forma parte d'un mercáu español, sinon a lo menos ibéricu y européu, y global. Les decisiones de verdá se tomen nun xalé suizu o de les Rocoses. Y quien ta nel poder lo que xestiona ye caltenese nesi poder. N'Asturies, la autonomía convirtióse namás que nuna plataforma pal afitamientu de la estructura del PSOE. Con esa finalidá actúen, tamién no económico. Con tola pasta que llegó de fondos mineros, europeos y la de Dios ¿cómo ye posible que teamos a la cola en productividá, na tasa d'actividá... y cola mesma población que va cuarenta años? Tamos falando d'inversiones millonaries (en euros) por habitante. ¿Qué facer?
Jesusito | 20-03-2008 - 10:25:40 GMT 1 #
Nin idea, macho... Lo que si se ye lo que nun se pue siguir faciendo, y ye siguir como hasta agora.
Nun paren d'asustanos col llobu de la sanidá, y la enerxía, y la xente sigue la corriente.
Toi seguru que dientro munchos años dalguién va tirar de la manta de quien se llevó tantes perres, y entós va ser tarde.
Salú.
Ateyavana | 21-03-2008 - 12:50:14 GMT 1 #