Escucando estrelles

Creo que’l grau d’aburrimientu, si pudiera midise, ye güei muncho más grande qu’enantes. Porque les profesiones d’enantes, al menos la mayoría, yeren impensables ensin una dedicación apasionada: los llabriegos namoraos de la so tierra; mio güelu, el magu de les meses guapes; los zapateros que conocíen de memoria los pies de los vecinos del pueblu; los guardaviesques; los xardineros; supongo qu’hasta los soldaos mataben entós con pasión. El sentíu de la vida nun yera un interrogante, formaba parte d’ello, d’un mou mui natural, nos sos talleres, nos sos praos. Cada profesión creara la so propia mentalidá, la so propia manera de ser. Un médicu nun pensaba como un llabriegu, un militar comportábase d’un mou distintu a un mayestru. Güei somos toos iguales, toos xuncíos pola común indiferencia pal nuestru trabayu. Esta indiferencia pasó a ser pasión. La única gran pasión colectiva del nuestru tiempu.

De Milan Kundera puen dicise munches coses, y non toes bones, pero la verdá ye que nos sos testos atopamos munches veces idees, coles que pues tar d’alcuerdu o non, que pues entesacar guapamente como cites. Esta ye de la novelina L’identité, del añu 1997, y apaez en llabios de Jean-Marc, ún de los protagonistes, nuna charra cola moza nun restaurante.