Escucando estrelles

Nun se vosotros, pero yo toi fartucu abondo de tolos gurús que nun paren d’ufiertanos agora soluciones a la crisis, de tolos que nos dicíen que ya lo víen venir… cuando velo venir vímoslo toos, pero naide nun fizo nada. A min dame que pensar que nengún d’ellos vaya a pasales putes daveres, son analistes de columna, de tertulia, ¿agora toca falar d’esto?, vamos a por ello, y con cuatro nociones yá tan pontificando (¿señálome?).

Naomi Klein o Leopoldo Abadía dan esplicaciones cencielles de tol problema, pa que tol mundu vea’l fedor nel que nos metimos. Cuando son los tiempos bonos, ye mui rentable’l dexar facer (laissez faire, diría dalgún), pero cuando les burbuyes españen, entós tiramos tola ideoloxía ultralliberalista a la basoria, quitamos la semeya de San Milton Friedman pa onde nun se vea, y llamamos a Papá Estáu pa que nos llimpie la mierda, nos dea la teta, y en cuantes teamos fartucos, nos dexe solos otra vegada pa siguir enredando.

Lo que pasa ye que si l’estáu s’endeuda pa salvar a los especuladores, facemos que’l presupuestu tenga que recortar per otros llaos, lo que tornao del romanu palatinu ye más o menos esto: el futuru va traenos recortes no social y privatizar lo poco que pue quedar de lo público. O seya, dexar en manes d’estos mesmos especuladores dalguna de les (poques) coses nes que tovía nun metieron la cuchara.

¿Ye llícito que l’estáu intervenga pa salvar especuladores? ¿Nun hai naide responsable de nada? ¿Ye normal qu’un altu directivu que fizo perder miles de millones tenga un contratu blindáu, enllenu cláusules que lu faen millonariu de toes toes? ¿Nun se pue sofitar a los que se van quedar ensin trabayu o na puta cai envede a toa esa morralla?

Y, por otra parte…

Especulación pura y dura: ensin regles, ganancia a mui curtiu plazu, traficando coles influencies a tutiplén… El modelu que prauticaben les grandes empreses tamién caló nes idees de la xente d’a pie. ¿Cuántes veces oyistis qu’hai qu’arriesgar pa ganar perres? ¿Cuántos nun conocéis que, teniendo un pisu, mercaben otru sobre planu por ganar perres?

El mio hermanu contóme fai bien poco una práctica que me paez que, por suerte, tovía nun llegó a Asturies, anque maxino que nun va tardar. Trátase de métodos de financiación alternativos, onde, siguiendo una estructura piramidal, caún de los que va entrando pon mil euros enriba la mesa y comprométese a meter otru par de primos que pongan otros mil caún. La gracia ta en que, el que ta na pica la pirámide cola cada poco, pillando la pasta de diez o doce inxenuos, dexando’l puestu a otru espabiláu que va controlar tol cotarru pa poder facer lo mesmo… O seya, como los trileros, pero xugando cola ambición de la xente: yo métome, dexo que m’estafen y depués voi estafar yo a otros.

Cuando me lo contaba yo ablucaba en colores… Si esto había una montonera xente que lo vía como normal nun m’estraña que llegaremos a esto… Si faigo una cadena de venta de pisos y vendo a otru que lu va vender… ye como’l xuegu de les sielles. Equí toos ganen, hasta que para la música y tan toos sentaos y queda’l curritu de pie. Esi del que se ríen toos, porque cuando les coses diben bien nun-y subieron el sueldu, y agora que van mal déxenlu na puta cai.

La culpa ye soltera, pero cortexámosla tiempu abondo como pa nun tener la nuestra parte de culpa…